1 2 3 4 5

دوخی زمان له‌ باهوزی ته‌کنولوژیادا / مهندس فریبرز موسی زاده

timthumb

دوخی زمان له‌ باهوزی ته‌کنولوژیادا / مهندس فریبرز موسی زاده

له‌ یه‌که‌مین ده‌قی سۆمه‌ریه‌کاندا ده‌رده‌که‌وێت که‌ زمان له‌ کۆنه‌وه‌ تا هه‌نوکه‌ کت ومت وه‌ک مێژووی نه‌ته‌وه‌کان له‌ هه‌ڵکشان و داکشاندایه‌. واتا کاتێک نه‌ته‌وه‌یه‌ک یان عه‌شیره‌تێک سه‌رده‌که‌ون زمانی ئه‌وانیش سه‌رده‌که‌وێت به‌ پێچه‌وانه‌شه‌وه‌ کاتێک ئه‌و نه‌ته‌وه‌یه‌ ده‌بێت به‌ کۆیله‌ و ژێرده‌ست و یا له‌ ناو ده‌چێت زمانی ئه‌وانیش ده‌بێته‌ زمانی کۆیله‌ و یا به‌ ته‌واوی له‌ ناو ده‌چێت.

زمان و ده‌سه‌ڵات وه‌ک هاوکێشه‌یه‌ک چاوی لێده‌کرێت، که‌ له‌ په‌یوه‌ندیه‌کی ڕاسته‌ و ڕاست دایه‌. به‌م واتایه‌ هاوکێشه‌ی زمان و ده‌سه‌ڵات په‌یوه‌ندیه‌کی توند و تۆڵیان پێکه‌وه‌ هه‌یه‌، تا ئه‌و ڕاده‌یه‌ که‌ ته‌نانه‌ت ده‌سه‌ڵات ده‌توانێت زمانێک له‌ ناو ببات یا زمانێک به‌ پاڵه‌په‌ستۆ بسه‌پێنێته‌ به‌ نه‌ته‌وه‌ی به‌رانبه‌ری خۆی.

له‌ ڕابردودا که‌ره‌کته‌ره‌کانی گۆرین و ناو بردن و یان زیندو کردنه‌وه‌ی زمان، زۆر به‌ ڕاشکاوی به‌رچاو ده‌که‌وتن. به‌ڵام ئیستا کۆمه‌ڵه‌ هۆکارێک، پێکه‌وه‌ ئه‌م هاوسه‌نگیه‌ ڕێک ده‌خه‌ن، که‌ جیاوازی زۆریان هه‌یه‌ له‌ هۆکار گه‌لی ته‌قلیدی و ترادیشناڵه‌کاندا.

وه‌ک ده‌زانین دۆخی هه‌ر زه‌مه‌نێک به‌ پێ ئه‌و کاته‌ دێته‌ گۆڕین و ناکرێت به‌ سانایی و ساکاری گۆڕانکاریه‌کانی دو سه‌رده‌م به‌ یه‌ک چاو شرۆڤه‌ی بۆ بکه‌ین . واتا ده‌بێت به‌ پێ هه‌لومه‌رجی ئه‌و هاوکێشه‌یه‌ له‌ زه‌مه‌نی خۆیدا خوێندنه‌وه‌ و شرۆڤه‌ی بۆ بکرێت.

بۆ نمونه‌ ژیاره‌ کۆنئاراکان وه‌ک میسر، ئه‌سینا و سۆمه‌ر زمانی نووسینی تایبه‌ت به‌ تۆژێکی نۆخبه‌ویه‌وه‌ بووه‌ و شوڕ نه‌بوه‌وه‌ ناو خه‌ڵکی ئاسایه‌وه‌. له‌ لایه‌کی تره‌وه‌ زۆر به‌که‌می کاری پێکراوه‌، زۆرتر بۆ ڕاپه‌ڕاندنی کار وباری سه‌رۆک هۆز و پاشاکان بووه‌. به‌ڵام ئیستا زمانی نووسین له‌ پانتایێکی به‌ریندا ، دێته‌ ناو گۆڕه‌پانی جیهانی مرۆڤدا.

photo_۲۰۱۷-۱۲-۲۳_۲۱-۲۷-۲۱

هێندێ له‌ جیاوازیه‌کانی زمانی نووسین سه‌رده‌می نوێ و کۆن ، ده‌توانین به‌ ئه‌م خاڵانه‌ ئاماژه‌ بکه‌ین

 

ا. له‌ سه‌رده‌می کۆن زمانی نووسین زۆرتر بۆ کاروباری پاشا و سه‌رۆکه‌کاندا بووه‌، به‌ڵام له‌م سه‌رده‌مه‌دا زمانی نووسین له‌ هه‌موو چین و تۆێژه‌کاندا به‌کار دێت و هه‌موو خه‌ڵک که‌ڵکی لێ وه‌رده‌گرێن.

 

ب. له‌ سه‌رده‌می کۆندا زمانی نووسین بۆ ده‌رکردنی یاسا و ڕێسا و یان ئه‌و شتانه‌ی به‌ ده‌سه‌ڵاته‌وه‌ په‌یوه‌ندیان هه‌یه‌ به‌کار ده‌هاتن، به‌ڵام هه‌نوکه‌ نووسین له‌ هه‌موو کون و قۆژبنه‌کانی ژیانی مرۆڤدا بوونی هه‌یه‌ و دێته‌ کار کردن.

ج. زمانی نووسین له‌ سه‌رده‌می کۆندا تواناکانی لاواز بوون و نه‌ده‌کرا هه‌رهه‌موو ئه‌و شتانه‌ی که‌ مه‌به‌سته‌ بنووسرێت به‌ هۆی لاوازی هه‌گبه‌ی وشه‌، به‌ پی پیویست وشه‌ نه‌بوون ، که‌ بتۆانرێت گۆزارێشتێکی ڕاسته‌قینه‌ له‌ خۆاستی نووسه‌ره‌که‌ به‌ده‌سته‌وه‌ بدات.

به‌ڵام ئیستا به‌ هۆی به‌هێز بوونی زمان و گه‌وره‌بوون و گه‌شه‌ کردن و له‌دایک بوونی هه‌زاران هه‌زار وشه‌ مروڤ ده‌توانرێت به‌ جوانی گۆزارشت له‌ ناخی خۆی بکات.

د. که‌ره‌سته‌کانی نووسین له‌ کۆندا به‌ سانایی ده‌ست نه‌ده‌که‌وتن وه‌ک وه‌ستای تایبه‌ت هه‌بووه‌ له‌ سه‌ر به‌رد نووسینه‌کان هه‌ڵبکۆڵیت. به‌ڵام له‌م سه‌رده‌مه‌دا چه‌ندها جۆر که‌ره‌سته‌ی نووسین به‌ ساکاری له‌ به‌ر ده‌ستایه‌ و ته‌نانه‌ت به‌ نه‌رمه‌واڵه‌(پڕۆگرام) نوێکان ده‌کرێت به سیسته‌می ده‌نگی قسه بکه‌یت و یه‌کسه‌ر ده‌نگه‌که‌ بکرێته‌ نووسین له‌ سه‌ر شاشه‌ی مۆبایل یان کۆمپیوته‌ر دا.

ه. له‌ کۆندا ئاریشه‌ی زۆر به‌رده‌م فێربوونی نووسین هه‌بووه‌ وه‌ک ئالیه‌تی فێرکردن و ده‌ست که‌وتنی مامۆستای تایبه‌تی فێرکاری و هه‌ر وه‌ها نه‌بووی سیسته‌می په‌روه‌رده‌ و خۆێندن به‌ڵام هه‌نوکه‌ سیسته‌می تایبه‌تی په‌روه‌رده‌ یه‌که‌م هه‌نگاوی فێرکاری زمانی نووسینه‌ بۆ خۆینکاری به‌رده‌نگی خۆیندن.

 

و. که‌م بوونی ئه‌زموونی نووسین له‌ کۆندا به‌ هۆی نه‌بوونی ژێده‌ره‌کانی نووسین به‌ پێچه‌وانه‌ نووسین ئیستا ده‌کرێت له‌ ئه‌زمونێکی چه‌ند هه‌زار ساڵه‌ی مرۆڤی که‌ڵک وه‌ر بگرێت و مه‌به‌ست ئه‌و که‌ له‌ ناخی ئه‌و هه‌ڵقولێت بێته‌ نووسین.

2

ز. جیهانی کۆن به‌ که‌ره‌سته‌ی تایبه‌ت ده‌کرا بنوسرێت، وه‌ک هه‌ڵکۆڵین له‌ سه‌ر ڕه‌وه‌ز و به‌رده‌کان ، یا خامه‌ و خه‌یزه‌ران به‌ جه‌وهه‌ر به‌کار ده‌هات. به‌ڵام له‌ سه‌ر ده‌می نوێدا به‌ هیچ شتێکی مادی نانوسرێت به‌ڵکو به‌ ئامرازێکی نوێ و به‌ شێوازێکی ته‌واو جیاواز دێته‌ نووسین ئه‌وه‌ش نوسینی ئه‌له‌کترۆنیه‌ که‌ له‌ جیهانی کۆمپیوته‌ر و ئه‌نترنێت دێته‌ وه‌شاندن.

ئه‌مه‌ هێندێ له‌ جیاوازیه‌کانی نووسینی جیهانی کۆن و نوێیه‌ که‌ له‌ وتاره‌دا زۆرتر مه‌به‌ستم نووسینی ئه‌له‌کترونی و جیهانی ماڵپه‌رو تۆڕه‌ کۆمه‌ڵایه‌تیه‌کانه‌ که‌ هۆکاری سه‌ره‌کی گۆڕانکاریه‌ نوێکان له‌ زۆربه‌ی بوار و ته‌وه‌ره‌کانی ژیانی ئه‌م سه‌رده‌مه‌یه‌.

هێندێ تایبه‌تمه‌ندی ئه‌نتێرنێت ئاماژه‌یان پێ ده‌که‌ین:

 

۱- به‌ بێ ناسینی پێشووتر ده‌توانین له‌ گه‌ڵ که‌سێکدا له‌ په‌یوه‌ندی بین.

 

۲- به‌ بێ ئه‌وه‌ی جوڵه‌ی جۆگرافیمان هه‌بێت ده‌کرێت په‌یوه‌ندیمان هه‌بێت.

 

۳- سنووره‌ جۆگرافیه‌کان ئیدی به‌ربه‌ست و له‌مپه‌ڕ نیین، چ له‌ ڕووی هه‌واڵ و زانیاری و چ له‌ ڕووی په‌یوه‌ندیدا.

 

۴- ڕوخانی سنووری (جێ – کات ) واتا له‌ یه‌ک کاتدا ده‌توانیین له‌ چه‌ند جێگادا وه‌ک گه‌ڕۆک بوونمان هه‌بێت و جۆگرافیاش نه‌هێته‌ گۆڕین. پێم وایه‌ یه‌کێک له‌ نهێنیه‌کانی سه‌رکه‌وتنی ئه‌نتێرنێت شکاندنی هاوکێشه‌ی(جێ – کات )ه .

 

۵- زانیاریی به‌ بێ سنوور له‌ یه‌ک مژاری تایبه‌تدا به‌م واتایه‌ له‌ نێت دا ده‌توانیین به‌ بێ سنوور زانیاری وه‌ر بگرین له‌ هه‌ر شت و بوارێکدا به‌ ساکاری و به‌ یه‌ک کرته‌ له‌ ماتۆری گه‌ڕانی گۆگڵدا.

 

۶- سه‌رچاوه‌کانی زانیاری ئه‌نتێرنیت زۆر زۆرن وه‌ له‌ هه‌موو گۆشه‌نیگاکانه‌وه‌ ئه‌و بابه‌ته‌ دێته‌ شرۆڤه‌کاری و لێکدانه‌وه‌ی بۆ ده‌کرێت. بوونی ڕای جیاواز و دژ به‌ یه‌ک له‌ جیهانی نێتدا بابه‌تێکی ئاسایه‌، وه‌ هه‌روه‌ها فره‌ سه‌رچاوه‌ی بوون، بۆ یه‌ک بابه‌ت ده‌توانێت ڕه‌هه‌نده‌ جیاوازه‌کان و ڕوانگه‌ فره‌ لایه‌نه‌کان ده‌ر بخات و هه‌ر بۆیه‌ تاک ده‌توانێت به‌ باشی و پان و به‌رینی ئه‌و بابه‌ته‌ ڕاڤه‌ بکات.

 

۷- ئه‌نترنێت له‌ هه‌موو ڕوه‌ وه‌ ده‌کرێت که‌ڵکی لێ وه‌ربگرین وه‌ک فێرکاری، هونه‌ری، فه‌ننی ، تیجاری، کۆمه‌ڵایه‌تی ، وێژه‌یی، که‌لتوری ، ئاڵوگۆڕێ زانیاری ، په‌یوه‌ندیه‌کان ، پزشکی و هتد… .

 

که‌ واتا ده‌کرێت له‌ یاریکردنی منداڵان تا ئه‌ستێره‌ناسی له‌م که‌ره‌سته‌ نوێیه‌ که‌ڵک وه‌ر بگیرێت.

 

هه‌ر به‌ هۆی ئه‌م تاقه‌ و هێزه‌وه‌ که‌ له‌نێتدا به‌دی ده‌کرێت، بۆ به‌ هێز کردنی زمانی زگماکیش که‌ڵک وه‌ر بگرین. زمان وه‌ک ئامرازێکی په‌یوه‌ندی ته‌نها پێناسه‌ ناکرێت به‌ڵکو له‌ زۆر ڕوویتره‌وه‌ وه‌ک هه‌ڵگری که‌لتور و بابه‌ت گه‌لێکیتره‌وه‌ چاوی لێ ده‌کرێت. هه‌ر وه‌ک ڕوونه‌ زمان له‌ کۆنه‌وه‌ تا ئیستا زۆر ئاڵوگۆڕی به‌سه‌ر هاتوه‌ چ له‌ ڕووی گۆڕینی فۆرم وقه‌باره‌ی تا له‌ دایک بوون و له‌ ناو چون، ته‌نها له‌ کیشوری ئافه‌ریقا چه‌ند سه‌د زمان له‌ ناو چوون.

 

ئه‌نترنێت ده‌توانێت وه‌ک خه‌نجه‌رێکی دو سه‌ر به‌کار بێت واتا چه‌ند ئه‌م که‌ره‌سته‌ ده‌توانرێت به‌ پێز و که‌ڵک بێت بۆ زمان و گه‌شه‌ کردنی دو هێنده‌ش توانایی تیایه‌ ببێته‌ به‌ سه‌نته‌رێک بۆ لاواز کردنی کۆڵه‌که‌کانی زمان. به‌ڵام ئه‌مه‌ ده‌گه‌ڕێته‌وه‌ بۆ ئه‌و نه‌ته‌وه‌ یان ئاخێوه‌رانه‌ که‌ چون ئه‌نته‌رنێت به‌کار بێنن. پوژیبه‌ (pugibet)له‌ سالی ۲۰۰۴دا پێشنیار ده‌دات که‌ فێرکاری و په‌رورده‌ی زمان به‌ره‌و جیهانی ئه‌نترنێت ئاراسته‌ بکرێت و په‌رتۆک وه‌لا بدرێت، له‌ به‌ر ئه‌م هۆکارارانه‌:

 

۱- له‌ نا کتێبه‌کاندا گرنگی به‌ که‌لتوری زاڵ، ده‌درێت ئه‌وه‌ له‌ کاتێکدایه‌ که‌ ئه‌نتێرنێت که‌لتوره‌ بچوکه‌کانیش گرنگی تایبه‌تیان هه‌یه‌ و هه‌مویان ناو ده‌برێن.

 

۲- ئه‌نترنێت به‌ پێچه‌وانه‌ی په‌ڕتوکی فێرکاری کۆمه‌ڵه‌ نه‌رین و ڕوانگه‌گه‌لی زۆرتر ده‌خاته‌ به‌رده‌ست خوێنه‌ری خۆی.

 

۳- زانیاریه‌کانی ئه‌نتێرنێت سه‌رده‌می و ئه‌مڕۆین، به‌ پێچه‌وانی کتێب.

 

ئه‌گه‌ر پوژیبه‌ (pugibet) باوه‌ڕی هه‌یه‌ که‌ ئه‌نترنێت ده‌توانێت سه‌رچاوه‌یه‌کی به‌ هێز بێت بۆ فێرکاری زمان پێم وابێ هه‌رواش ده‌توانێت ڕوخێنه‌ر بێت، ئه‌گه‌ر به‌ باشی که‌ڵکی لێ وه‌ر نه‌گیرێت.

 

بۆ نمونه‌ تۆڕه‌ کۆمه‌ڵایه‌تیه‌کان وه‌ک فه‌یسبووک، تویته‌، واتساپ و تێلگرام هێندێ هێمایان هێناوه‌ وه‌ک ئه‌م هێمایه‌ که‌ په‌نه‌جه‌ی گه‌وره‌که‌ به‌رز کراوه‌ته‌وه‌، ئه‌م هێمایه‌ گه‌لێ وشه‌ و ته‌نانه‌ت ڕه‌سته‌ش کوشتووه‌ و له‌ کار کردنی گه‌مه‌ زمانیه‌کاندا ده‌ری کردون.

 

به‌واتای تر یه‌کێک له‌و هێمایانه‌ مانای زۆر ده‌به‌خشێت که‌ به‌ هێمایه‌ک ده‌گوازێته‌وه‌ بۆ به‌رانبه‌ره‌که‌ت، له‌ جێ یه‌ک دنیا وشه‌ی جوان که‌ هه‌موویان فه‌راموش و له‌ بیر ده‌کرێن بۆ نمونه‌ هێندێ له‌و مانایانه‌ بریتین له‌؛ خۆشی، په‌سند بوون، زۆر جوانه‌، شازه‌، ده‌ست خۆش، له‌گه‌ڵتام، ڕێک وایه‌، منیش وا بیرده‌که‌مه‌وه‌، خۆشم دێت، ئافه‌رم، هاوڕام، و چه‌ندین و چه‌ند وشه‌ و چه‌مکی تر که‌ به‌کار هێنانی ئه‌و هێمایه‌ ئه‌م هه‌موو وشه‌ له‌ گه‌مه‌ زمانیه‌کاندا وه‌لا ده‌خرێن و به‌و ته‌نها هێمایه‌ ئه‌م هه‌موو چه‌مکانه‌ ورده‌ ورده‌ له‌ناو زماندا به‌ره‌و کاڵ بوونه‌وه‌ ده‌چنن.

 

بێ گۆمان ، جیهانی بوون و عه‌وله‌مه‌ خۆی له‌ خۆیدا وشه‌کانی زمانه‌ جۆراوجۆره‌کان ده‌کاته‌ ناو که‌لتوری زمانی و قاموسه ‌زمانیه‌کانی ده‌ورو به‌ری و هیچ زمانێک نییه‌ که‌ وشه‌ی بیانی نه‌هاتبێته‌ ناو زمانیه‌وه‌ یان نه‌هێته‌ ناو زمانیه‌وه‌. (عدنان الصفور) لێکۆڵه‌ری عه‌ره‌ب له‌ لێکۆلینه‌وه‌یه‌کدا که‌ سه‌ر مژاری زمان کردویه‌ ده‌ڵێت وشه‌ی زۆری فارسی له‌م ماوه‌یه‌دا له‌ ناو زمانی عه‌ربیدا زۆر زیادیان کردووه‌.

 

به‌ پێچه‌وانه‌ی باوه‌ڕی ئێمه‌ که‌ ئه‌و وشه‌ی عه‌ره‌بی ڕۆژانه‌ دێته‌ ناو زمانی فارسی ئه‌وه‌ ده‌سله‌مێنن که‌ وشه‌ زۆری فارسیش له‌ ناو عه‌ره‌بیدا هاتوون و دێن ، واتا زمان که‌ڵک له‌ وشه‌ی زمانه‌کانیتر وه‌ر ده‌گرێت، به‌ڵام ئه‌م کاریگه‌ریه‌ جیاواز ده‌بێت له‌ گه‌ڵ ئه‌م جۆر بیروکانه‌ی که‌ منداڵ به‌ ته‌واوی فێری زمانی تر ده‌که‌ن و زمانی زگماکی وه‌لا ده‌ده‌ن.

 

دۆخی کرماشان و هێندێ شاری تر جیاوازیه‌کی تایبه‌ته‌ی هه‌یه‌، له‌وێدا دایک و باوکی کورد به‌ بێ هیچ پاڵه‌په‌ستو و زه‌ختێکی ده‌ره‌کی خۆیان به‌ دڵخۆازانه‌ له‌ که‌ڵ منداڵیانا به‌ فارسی قسه‌ ده‌که‌ن و مناڵ له‌ مافی فێربوونی زمانی زگماکی بێ به‌ش ده‌که‌ن ، ئێستا شاری کرماشان که‌ سه‌یری بکه‌ین زۆرینه‌ی گه‌نج و لاو و منداڵ به‌ فارسی ده‌ئاخه‌فن ، و کوردیش نازانن، پاساوی ئه‌وان وایه‌ ده‌ڵێن با مناڵه‌کانمان له‌ داهاتوو زاری کوردی له‌ بێژه‌کردنی فارسیاندا به‌دی نه‌کرێت و زمانی فارسی به‌ گۆ کردنێکی ته‌واو فارسانه‌ بێته‌ سه‌ر زاریان. ئه‌مه‌ له‌ کاتێکدایه‌ که‌ کرماشان هه‌ر وه‌ک ده‌زانین شارێکی کورده‌ و زۆرینه‌ی هه‌ره‌ زۆری شار کورد زمانن و ره‌گه‌زی برا فارسه‌کانمان زۆر که‌مه‌. فاکتی زۆر هه‌ن بۆ ئه‌م ڕاستیه‌ بۆ نمونه‌ئۆسکارمه‌نی ئاڵمانی له‌ ۱۹۰۵ ده‌ڵێت: هه‌ر کاتێک ده‌چن بۆ کرماشان با وه‌ڕگێرێکی کوردتان له‌ گه‌ڵ بێه‌ چون ته‌نها ۱۵ نه‌فه‌ر فارس زمان له‌وێ بوونیان هه‌یه‌ که‌ هه‌موویان کار به‌ده‌ستی حکومه‌تن یان ۱۸۵۰که‌یه‌که‌مین نه‌خشه‌ی کرماشان له‌ لایه‌ن عه‌قید چریکۆڤی روسه‌وه‌ گراڵه‌(دیزاین) کراو، ڕێژه‌ی نیشته‌بووانی ئه‌م شاره‌ی چل هه‌زار تاک کورد نووسیووه‌ وته‌نانه‌ت ناوی یه‌ک فارسیشی نه‌هێناوه‌.

واتا هێندێ جار مرۆڤ به‌ ده‌ستی خۆی ده‌توانرێت ببێته‌ هۆکاری له‌ ناو بردنی زمانی زگماکی خۆی، به‌ هۆی که‌متر خه‌می و خۆ به‌که‌م زانینی زمانی خۆ جێیی.

هه‌ر به‌م بۆنه‌یه‌وه‌ بیری نامه‌یه‌کی مامۆستا هه‌ژار موکریانی که‌ بۆ حه‌وته‌نامه‌ی کوهستان له‌ سالی ۱۳۲۴ ژماره‌ ۱۸ لاپه‌ره‌ ۸ ده‌که‌وم، که‌ ده‌ڵێت یه‌کێک له‌ مژاره‌ ته‌واو گرینگه‌کانی کوردستان زمانه‌ و هه‌ر وه‌ها ده‌ڵێت هه‌ وه‌ک ئه‌وه‌ی خودای دلۆڤان گرینگی داوه‌ به‌زمانی قه‌وم و نه‌ته‌وه‌کان، چون ده‌کرێت ئه‌م هه‌دیه‌ی خوداوه‌ندیه‌ ڕچاو نه‌که‌ین.

 

بیروکه‌ی زمانی زگماکی له‌ ناو ئێرانی سه‌رده‌م عه‌باسیه‌کانه‌وه‌ زۆرتر گرینگی پێدرا له‌و کاته‌وه‌ که‌ ڕادمان کوڕی ماهه‌ک ناسراو به‌ (یعقوب لیث صفاری) له‌ هه‌موو ئێراندا زمانی عه‌ره‌بی قه‌ده‌غه‌ کرد و زمانی فارسی ده‌ری له‌ جێ ئه‌و دانا. و به‌ باشی ده‌زانین به‌ دوای ئه‌م وه‌رچه‌رخانه‌ بۆ که‌ڵه‌ شاعیرانێک وه‌ک (فردوسی سعدی، مولانا، حافظ) هاتنه‌ ناو گۆڕه‌پانی وێژه‌ی فارسیه‌وه‌.

 

به‌ڵام ئه‌مڕۆ پێویست به‌ ده‌ر کردنی داخویانی و بڵاوکراوه‌یان نییه‌، به‌ڵکو ده‌کرێت به‌ ئامرازه‌کانی فێرکاری ئه‌له‌کترونی و کورته‌ فیلم، له‌ ته‌بلێت و کۆمپیوته‌ر وانه‌ی زمانی زگماکی به‌ ئاسانی بوترێته‌و هه‌روه‌ها دانانی نه‌رمه‌واڵه‌ی فێربوونی زمان به‌ ده‌نگ و ڕه‌نگه‌وه‌، ده‌توانرێت چ ڕایڵه‌کان ، ماڵپه‌ڕ و تۆڕه‌ کۆمه‌ڵایه‌تیه‌کان هه‌م به‌ شێوازی ده‌رهێڵ(آفلاین) و چ به‌ جۆری سه‌رهێڵ(آنلاین) بۆ فێرکاری و به‌ هێزکردی زمانی زگماکی به‌ شێوازێکی زانستی که‌ڵکی لێوه‌ر بگیرێت و (جیلی تازه) نه‌وه‌ی نوێ به‌ زمانی خۆی ئاشت بکرێته‌وه‌، و فێر ببێت پێ بخوینێت و بنوسرێت. ده‌توانین بڵێن وێبگه‌ (web) توانای ئه‌وه‌ی تیاییه‌ که‌ ببێت به‌ قوتابخانه‌یه‌ک گه‌وره‌ و ئازاد بۆ هه‌موو نه‌ته‌وه‌کان، وانه‌کانی زمانیش به‌ ئاسانی و له‌ هه‌موو کاتێکدا به‌رده‌ست فێرخۆازانی زمان بکه‌وێت و ئه‌مه‌ ده‌رفه‌تێکی زێڕینی نوێیه‌ که‌ ته‌کنۆلوژیا له‌ ڕێگای server راژه‌کاره‌کانه‌وه‌ خستویانه‌ته‌ به‌رده‌م نه‌ته‌وه‌ که‌مینه‌کان و له‌م ڕێگایه‌وه‌ بوژانه‌وه‌ی زمان ڕێک بخرێت.

 

ته‌کنۆلوژیا ده‌توانرێت وه‌ک باهۆزێک چاوی لێ بکرێت که‌ داپڵوسێنه‌ری زمان، که‌لتور،داب و نه‌ریته‌کان بێت و ده‌توانرێت ببێت به‌ په‌ڕژینی پاراستنی زمان و که‌لتور. خاڵی گرینگ له‌م هاوکێشه‌یه‌دا تێڕامان و ڕاڤه‌ی ئێمه‌یه‌ که‌ چون ئه‌م که‌ره‌سته‌ نوێیه‌ به‌کار بێنین و چون بیکه‌ین به‌ قه‌ڵغانی پاراستنی زمان و یان چون بیکه‌ین به‌ شمشێری سه‌ر بڕینی زمانی خۆمان.

 

ئاوه‌ز و ژیری نه‌ته‌وه‌کان به‌رانبه‌ر به‌ ئه‌م ته‌حه‌دا نوێیه‌، وڵاتێک ده‌بات به‌ره‌و که‌ناره‌کانی بوژانه‌وی زمان و نه‌بوونی به‌ڕێوبه‌رایه‌تێکی بیرمه‌ندانه‌ده‌بێت هۆکاری ڕوخان و داڕمانی کۆڵه‌که‌کانی زمان و که‌لتوری ئه‌و نه‌ته‌وانه‌

درباره ی مـظفـر ولـدبیگی

ئه م وب سایت که له به ر چاوی خوینه رانی به ریزه ، له لایه ن مزه فه ري وه له د به گي و به هاوكاري هيوای برای ئه رکه کانی به ریوه ده چی . له خوینه رانی ئه م توره کومه لایه تیه داواکارین بو باشتر به ریوه بردنی،هاریکاری و هاوکاریمان بکه ن . بو په ره پیدانی زياتر به ژماره موبایلی 09183318945 یا ئیمه یلی mozafarnoryaw@yahoo.comپه یوه ندیمان پیوه بگرن . سه ربه رزیتان ئاره زومانه

پاسخ دهید

نشانی ایمیل شما منتشر نخواهد شد.